Liu tiha tinan atus ida ona, fronteira ka baliza kolonial ida hafahe (ilha) Timor ba rua. Fronteira ne’e hadukan no hafahe povo Lookeu, haketak sira nia rai, sira nia bee no sira nia ai-knanoik. Timor nia bani (wani) ba bani-been fuik dezafia divisaun ne’e. Sira nia dalan ba mai (migrasaun) mak esensial ba agrikultura no moris diak espiritual ema no fatin ne’be hakno’an (depende) ba sira. Iha ritual kolheta bani been nian, mane sira ne’be sai ba ai-leten hananu ho lian domin ba bani liurai-feto sira. Hananu sira husu ba bani sira atu fo sira nia been midar no fila fali mai dala rua, tinan ba tinan.
Filme ida ne’e mak rezultadu husi kolaborasaun ba tempu naruk entre peskizador Balthazar Kehi, Lisa Palmer no povo husi Balthazar nia rai Lookeu. Nia hato’o oinsa komuniade ida ne’be enfrenta situasaun ne’be nia agrodiversidade (ai-han oin oin ba bani) tun, no integrasaun ba ekonomia merkadu nian sae, hakarak hamahan bani sira nia dalan ba mai hodi mantein sira nia identidade.