Hahán tradisionál ho naran “Umu-Umu” ida ne’e hahán orijinál Timor husi Munisipiu Lautem, dala ruma iha munisípiu sira seluk mós halo ho naran ne'ebé diferente. Uluk iha tempu bei'ala sira nian, umu-umu ne’e sei halo bainhira batar komesa tasak no tempu Sau batar.
Prosesu halo Umu-Umu ida ne’e mak hanesan: primeiru ita sei ba kolleita batar nurak iha to’os no hamoos batar refere hodi hasai nia kulit sira, depois dé ida ne’e ita sei behu hotu no tau natoon ba iha luhu laran hodi fai fali batar ne’e to’o rahun didi'ak. Tuir mai batar ne'ebé mak ita halo rahun ona sei halo belar, depois dé ida ne’e ita nono be iha sanan rai ka sanan alumíniu mós di'ak to’o bee nakali hafoin ida ne’e ita tau Umu-Umu ba iha bee ne'ebé nakali no daan to’o tasak. Bainhira tasak ona ita bele hasai no bele konsumu ona. Hahán ne’e morin no nia iha sabór di'ak, bainhira ita han ita sei sente bosu ho durasaun ne’ebé mak kleur oituan.
Iha tempu batar nurak no seidauk halo serimónia sau-batar ema sira ne'ebé lia na'in ka sira ne’ebé tuur iha uma lisan, iha lian fataluluku dehan “o’omimiraka” labele han, bainhira serimónia sau-batar halo ona sira foin bele han.
=======================================================================
The traditional food called "umu-umu" is an indigenous food of Timor Leste originating from Lautem Municipality, sometimes in some other municipalities also make it but maybe the name is different. In the old days, umu-umu would be made during the corn harvesting season.
The process of making this umu-umu are: Firstly, we will take the young corn in the field and clean the corn by peeling the skins, then we will shell the corn and put the corn grains into a woven basket to be pounded until crushed. Then we will flatten the corn that has been crushed, then proceed to boil water with a pot made of clay or aluminum pot until the water boils. After the water boils, we put the umu-umu into the boiling water and cook until cooked. After cooking, we can pick it up and eat it immediately. This food is fragrant and has a good flavor, when we eat it, we will feel full for a very long time.
During the corn season, if the corn harvesting ceremony has not been conducted then the customary chief or the traditional house keepers, in Fataluku language "O'o mimiraka" they are forbidden to eat the corn until the corn harvesting ceremony is conducted.