Lulik Kornel ida ne’e iha tempu uluk Malae Mutin seidauk tama Timor, lulik ne’e iha ona, no ami nia bei'ala sira sempre adora no lulik ne’e eziste iha ami nia uma lisan ne’ebé bolu dehan uma fatuk belar (fatuk katak to’os no Belar katak haku'ak ema hotu). Iha tempu ne'ebá iha tinan 1612 ami nia liurai Kornel Don Hipolitu finaliza nia estudu iha Makau no mai iha ami-nia rai, nia lori mós ho katana, bikan no sasán sira seluk. Iha tinan 1615, bainhira nia mai ukun Manatutu nia lori nia povu Barique tomak ba hakfolik nia ferik oan iha Fatuberliu. Nia ferik oan nia naran mak Usinak no nia naran sarani mak Carlota. Usinak nia asesoris balun hanesan Mamolik ne'ebé iha momentu ne'ebá nia folin hanesan ho kuda hitu no bikan han nian. Bainhira iha kampaña kona ba konstrusaun estrada  ba dezenvolvimentu nasionál nian mak tama mai iha suku ida ne’e karik, ami sei lori katana ne’e ho sasán lulik sira ne’e hodi halo rituál no hamulak ba rai hodi fó lisensa. Aleinde ne’e iha tempu halo tos ka natar ema sempre mai husu ami hodi lori katana ne’e no sasán lulik sira ne’e ba ko'alia no hamulak ba rai hodi fó buras ba plantasaun sira ne'ebé iha toos no natar laran.
Katana no lulik Kornel ida ne’e sai hanesan lulik no rikusoin tuan ba uma lisan fatuk belar husi tempu uluk to’o agora. Sasán lulik sira ne’e ami rai iha ami nia uma lisan ida ne’e to’o iha tempu ruma atu halo rituál ka halo adat ruma karik ami sei hatuun no kesi hena mean no sunu lilin mak ami ko'alia. Antes atu hatuun sasán lulik hirak ne’e hodi ba ko'alia adat, ita presiza oho fahi ida mak foin hatuun hodi lori ba halo rituál, bainhira atu lori fila mai hodi hasa'e fali iha uma lisan mós presiza oho tan fahi ida mak foin hasa'e fali ba nia fatin. Atividade kulturál saida de'it mak iha suku Umaboku ne’e lia na'in husi uma lisan Fatuk Belar ne’e mak sempre ba ko'alia tantu halo rituál, inaugurasaun no seluk tan. “Uluk ha'u la hatene buat ida kona ba lulik adat no rituál sira ne’e, maibé bainhira ha'u-nia aman sira mate hotu ha'u-nia tiun sira sunu lilin no fó malus mai ha'u mama, ho nune’e espontaniamente ha'u bele hatene rasik halo rituál no lulik koronél  ne’e to’o ohin loron”.

Bandu kona ba Uma fatuk belar ne’e mak bainhira feto foun ne'ebé mak seidauk halo nia barlaki,  sira labele tama ou sa'e uma lisan ida ne’e, no ba feto foun sira ne'ebé halo ona sira nia barlaki bele tama ba uma lisan ne’e, maibé só mai te'in de'it. Ba oan feto raan sira ne’e bandu tebes atu sa'e ou tama ba uma lisan ne’e, tanba bainhira sira sa'e,  sira nia futar/menstruasaun sei para ou maran (menopauza), tan ne’e bandu tebes feto klosan  sira atu tama ba uma lisan ida ne’e.
===================================================================================
This Lulik Kornel existed before the colonization of Timor Leste by the white people, and our ancestors always worshipped this lulik. This lulik is found in our traditional house called "Fatuk Belar" (Fatuk/stone means hard and belar/flat which means hugging everyone). In 1612, our king, Kornel Don Hipolitu, completed his studies in Macau and came to our place with swords, plates, and other items. In 1615, when he governed Manatuto, he brought the entire Barique people to present his wife's dowry in Fatuberliu. His wife's name was usinak and her baptismal name was carlota. Usinak's accessories were Mamolik which at the time cost the same as seven horses and plates of food.

When there is national road construction coming into this village, we will bring the machetes and sacred objects to the ritual place to ask for permission. In addition, during the gardening season or working in rice fields, people always ask us to bring swords and sacred objects to go and pray to the ground to give fertility to the plantations in the fields and rice fields.

These swords and Lulik Kornel are sacred and old objects that have become the tradition of the Fatuk Belar traditional house from the past until now. We keep these sacred objects in our traditional house and when we want to perform a ritual or make a custom we take them down from their place and tie them with a red cloth by lighting a candle and then praying. Before taking down the sacred objects to perform a ritual or custom, we need to slaughter a pig as well as if we want to put the sacred objects back in place we must slaughter a pig again. As for what cultural activities there are in Umaboku village, the customary leader of the Fatuk Belar traditional house will speak about them, including rituals, inaugurations, and so on. "I didn't know anything about customs and rituals before, but when my father died my uncle burned a candle and let me chew betel and spontaneously I was able to find out for myself how to do rituals and lulik Koronel until now."

The prohibition found in the Fatuk Belar house is when a daughter-in-law who has not been given a dowry is not allowed to enter the traditional house, and a daughter-in-law who has been given a dowry, can enter the traditional house, but only to do the cooking. For young girls, it is strictly forbidden to enter this traditional house, because if they enter it, their period blood will stop or dry up (menopause).