Tuir lia-na’in Domingos Barros, rai ne’ebé ohin loron forma parte suku Manutasi nian horiuluk pertense ba suku viziñu haat: Soro, Ainaro, Nunumogue no Hatubuilico. Suku ida-idak oferese rai pedasuk ida no estabelese sira-nia baliza ho Manutasi.

Lia-na’in ka “Tata Lulik” sira husi uma ne’ebé agora lokaliza iha Manutasi hasoru malu ho sira-nia viziñu sira no halo akordu ida kona-ba baliza liuhosi tau ai-riin tuir baliza. “Ta’a ai ida tidi lori tidi netik iha ne’e hanesan bandeira.”

Ria Aai Lau mak fatin orijinál ba uma sira iha Manutasi molok tempu 'monarkia' no molok harii suku Manutasi. Ita sei bele haree fatuk hada sira husi uma hitu hanesan tuirmai:

1.	Lakmeta
2.	Nunufu
3.	Dirpu
4.	Builor
5.	Mau Lelo
6.	Terolau
7.	Uma Liurai

Ria Ai Lau mak knua ba uma fukun sira ne'e molok tempu 'monarkia' no molok harii suku Manutasi. Iha relasaun ho Nunomogue no mós Atsabe. 
 
Uma Liurai mak uma ida ne’ebé uza hodi “simu Dom husi Aleiu” no ema konsidera hanesan uma “sanak” husi uma Nunufu Lakmeta, Basmeri, Asae Semali no Terolau. 

Horiuluk rituál sira hala’o iha Ria Ai Lau pelumenus tinan ida dala haat. 

Out/Nov: “Has Sin, Batar Fin” – durante rituál ida ne’e fini batar no koto fahe ba membru komunidade;
Fev/Marsu: “Sau Batar” – rituál kolleita batar nian
Jullu: “Fulan Boot” – Serimónia fulan nakonu ba membru komunidade sira simu matak-malirin husi bei’ala sira. 
Tinan Foun: “Ton Heu, Ton Aile, Halot” – serimónia ida hodi fó rota (autoridade atu ukun).