Jerasaun Uma lisan Taiben ne’e nia huun lolos mai husi Bobonaru, iha momentu ne'ebá bei'ala sira muda mai husi Bobonaru mai iha Fatuloro mak muda tun fali mai iha Tilomar. Bainhira avoo sira mai husi Bobonaru ne’e sira lori ho bee lulik ida ho au oan mai kuda iha Tilomar to’o agora bee ne’e sai be matan lulik ida iha ne'ebá no au oan ne’e mós buras besik bee matan lulik ne’e. Durante tinan naruk nia laran jerasaun Taiben moris hakmatek no harmonia, maibé depois dé Timor ukun an husi okupasaun Indonezia, jerasaun mane sira husi Taiben sempre hetan susar hanesan moras, sorte ladi'ak, no mane sira sempre mate tu-tuir malu. Entaun iha momentu ne'ebá ami hahú buka tuir no ba halo konsultasaun ho matan-dook ida, no matan dook ne’e hateten dehan “se imi la harii imi-nia uma lisan, maka imi jerasaun mane sira sei mohu hotu”. Entaun ami fila hanoin ona no halo planu oinsá para ami bele harii ami nia uma lisan rasik, tanba iha tinan barak nia laran ona ami jerasaun Taiben la halo Umalisan no katuas sira mós la konsege konta lala'ok no kultura Taiben nia hotu ba ami jerasaun foun sira, entaun susar tebes ba ami atu hatene prosesu hodi harii Umalisan, entaun ikus mai ami deside hodi ba husu tuir informasaun kona ba uma lisan ne’e iha Bobonaro no Fatuloro.
Bainhira kolleita hotu informasaun, ami hahú bolu malu no halibur hotu ami nia uma maun alin sira, fetosaan, no umane sira hodi tuur hamutuk no deside tempu atu harii ami nia uma lisan ne’e. Bainhira deside ona tempu, prosesu harii uma lisan Taiben mós ha'u halo ona.
Iha prosesu harii uma lisan ne’e, uluk nanain sei bolu fetosaan sira hodi tuur hamutuk no ba taa ai. Iha etapa hirak ida ne’ebé mak persiza atu harii uma lisan ne’e, mak hanesan ba dala uluk sei taa uluk uma nia riin haat, hafoin ida ne’e kontinua taa fali ai-riin rua ne’ebé mak hanaran bei feto no bei mane, depois dé ida ne’e mak foin taa fali riin tatuur sanulu resin rua, no kontinua taa fali ai hodi nahe iha laran ne'ebé ema bolu dehan labis mane no labis feto. Durasaun ba taa ai ne’e han to'o tinan ida mak foin remata, tanba ida ne'e lulik no la bele taa ai ba etapa hirak ne’e dala ida de’it no nia prosesu harii uma lisan ida ne’e mós bele han tempu to'o tinan sanulu mak foin remata, maibé ida ne’e mós seidauk inklui ho inaugurasaun ba uma lisan refere. Antes atu inaugura uma lisan ne’e, sei halo serimónia kore metan, depois sei ba hamoos bee matan lulik ho fahi ida hodi fati fahi nia raan nune’e horsida bele hodi hisik uma lisan, no jerasaun hotu-hotu husi uma lisan Taiben nian, depois sei hamulak fali iha Uma laran, hafoin ida ne’e maka bele halo inaugurasaun.
Hafoin inaugura hotu tiha uma lisan Taiben ne’e mak foin ami sente laran hakmatek tanba buat hotu la’o ho di’ak, karik iha buat balun sei sala durante prosesu harii uma lisan ne’e entaun nia konsekuénsia mak liu semana ida ka rua hafoin uma lisan ne’e inaugura ami mane sira husi uma lisan ne’e sei mate tu-tuir malu, maibé ikus mai hatudu katak buat hotu la'o di'ak no ami mós isin di'ak no saúde di'ak nafatin to agora.
 Uma-lisan ida ne’e nia lulik mak na’an Manu Tafui no na’an Fahi fuik labele lori tama ba uma lisan, hirak ne’e bandu tebes. Karik manu tafui ho fahi fuik  moris bele lori tama, maibé bainhira animál rua ne’e mate ona no nia na’an ne’e bandu tebes, se bainhira lori tama ami nia isin sei katar no liman fuan sira ne’e sei dodok sai badak no kotu hotu.
Iha uma lisan ida ne’e mós husi uluk kedas avoo sira rai sasán sira hanesan ai-abut, kakaluk ho Suri lulik ne'ebé bei'ala sira rai hela mai ami to’o agora ami sei rai hela hodi hamulak. Aleinde sasán lulik sira ne’e ami iha sasán lulik barak maibé iha tempu okupasaun Portugues no Indonezia ema foti hotu. Uma Lisan ida ne’e sei iha ligasaun forte ho Umalisan husi Bobonaro no Fatuloro tanba avoo sira mai husi Bobonaro mak mai hela iha Fatuloro, depois mak muda fali mai iha Tilomar iha tempu Portugues.
================================================================
The origin of the Taiben traditional house comes from Bobonaro, when our ancestors moved from Bobonaro to Fatuloro and then moved again to Tilomar. When they moved from Bobonaro they brought with them holy water and bamboo trees and planted them in Tilomar, until now the water has become holy water and the bamboo has also grown big near the holy water. For many years the Taiben generation lived peacefully and happily, but after Timor Leste separated from Indonesian colonisation, the Taiben male generation always experienced difficulties such as illness, bad luck, and the men of this generation of the traditional house died in succession. So, at that time we started looking for the cause and consulted a shaman and he said that "if you don't build your traditional house then the male generation of your family will die in succession". 
So, we went home and started thinking how we could build our own traditional house, because for many years our Taiben generation had never built a traditional house and our elders did not tell us in detail the history of Taiben behavior and culture, so it was very difficult for us to know how to build this traditional house, and we asked our traditional house colleagues from Bobonaru, and Fatuloro.
After gathering all the information, we started to gather together the relatives of the traditional house, the family of the fetosan, and the umane to discuss and decide the date to build the traditional house, after deciding the date the process of building the Taiben traditional house began. 
In the process of building the traditional house, the Fetosaan family will first be invited to gather and cut the wood. There are several steps that must be taken in the process of cutting wood to build this house, namely the first step will cut wood for the four pillars of the house, then proceed to cut two logs for the pillars which are named "Bei Feto" and "Bei mane", after that we cut wood for twelve pillars which we call "ai-riin tatuur", and then proceed to the next stage which is cutting wood to be spread inside the house called "Labis mane" and "Labis feto". The time to cut down the wood to build the house takes one year because it is a sacred thing and the wood to make the traditional house cannot be cut down at once the process of building the house also takes about ten years, but even this does not include the inauguration.
Before inaugurating this traditional house, there must first be a "kore metan" ceremony, then clean the sacred spring by slaughtering a pig and, the pig's blood will be taken, and the pig's blood will be applied to the entire house and all Taiben generations, then continued with prayers in the house, after which the traditional house can only be inaugurated.
If something goes wrong during the process of building this house then the consequences are more than a week or two after the house is built, the male generation of this house could die one by one, but in the end, everything went well and the male generation is fine and we are still healthy until today we rest.

Things that are forbidden in this traditional house are not allowed to bring wild boar meat and red partridge, if we do disobey the prohibition, our bodies will itch and hurt and then will rot.
We also have relics of our ancestors such as talisman charms, tree roots, and swords that were sacred to our ancestors which we still protect and worship today. We have many sacred objects, but during the Portuguese and Indonesian colonisation, everything was taken away by the colonisers. This traditional house still has a strong connection with traditional houses from Bobonaro and Fatuloro because our ancestors came from Bobonaro who lived in Fatuloro, and then moved to Tilomar during the Portuguese colonisation. The owner of this traditional house is Lisan Taiben, and now our uncle, Hilario Cardoso, is our traditional leader.