Uluk iha ita-nia bei'ala sira nia tempu ne’e buat ida hena ne’e laiha, entaun sira tenke homan biti hodi nahe iha hadak leten mak foin tuur hodi han hemu ka simu bainaka. Iha tempu ne'ebá bainhira bainaka ruma mai vizita, tantu reinu baibain, família, ka Liurai mak mai mós sempre uza renda biti ne’e iha hadak leten mak hodi tau be, tua, ka tabaku ba hodi serve malu, maibé karik simu liurai sira ne’e diferente, tenke nahe tula malu to’o dalas tol-tolu mak foin liurai tuur iha leten. Ne’e mak ema dehan nahe biti Hein tol-tolu Takan tol-tolu. Biti ne’e halo husi akadiru tahan mak hodi homan sai Biti ne'ebé ema uza ba nahe iha hadak leten. Biti renda ne’e iha tempu ne'ebá sai hanesan alas ka biti ida ne'ebé avó sira nahe iha hadak leten mak hodi tuur iha leten hodi han, hemu, fuma, ka mama hodi konversa ba malu.
Prosesu prodús biti renda ne’e iha etapa primeiru ita ba taa uluk akadiru tahan no sei habai halo maran. Karik iha tempu udan prosesu habai akadiru tahan sei lori tempu kuaze semana ida mak foin maran. Depois akadiru tahan ne'e maran ona, sei hasai nia kesak hotu mak foin ita fahe (sakat) akadiru tahan ne'e hodi halo sai medida ne'ebé ita hakarak, tuir mai maka foin homan sai ba biti tuir medida ne'ebé ita hakarak. Biti ne’e ita bele uza iha tempu saida de'it no iha ne'ebé de'it, maibé dala barak ita-nia avó sira uluk uza ba tuur hodi han hemu no simu bainaka.
Laiha bandu ruma ba iha prosesu homan biti no uza biti ne’e maibé iha regulamentu kona ba uza hodi serve liurai no reinu baibain.
-------------------------------------------------------------------------------------------------------------------
In ancient times our ancestors did not have cloth, so they had to weave mats to spread out on the floor or platform of the house to sit down to eat and drink or receive guests. When a guest came to visit, be it a commoner, a family member, or a king, they always used "Biti renda" on top of the floor to put water, wine, or cigarettes to entertain the guest. However, the banquet for kings is different from ordinary people in that the mats must be laid overlapping up to three layers and then the kings sit on them and this is called "Nahe Biti Hein tol-tolu Takan tol-tolu". The mats are made of woven palm tree leaves. "Biti Renda" in ancestral times was used as a mat to eat, drink, smoke, or chew betel to talk to each other.
The first stage of the manufacturing process involves taking the palm leaves and drying them. During the rainy season, the drying process will take almost a week. After drying, the sticks on the palm leaves will be removed and then the leaves will be split according to the desired size, and then woven according to the model and size we like. These mats can be used anytime and anywhere, but most of the time our ancestors used them to sit down to eat and drink and receive guests.
There are no cultural taboos linked to the weaving or use of this kind of mat, but there are rules distinguishing the use of mats to serve kings and commoners.