Tais mane Imi Leka Dao (Tais mane mean risku neen )

Dokumentasaun Fundasaun Alola hasai iha suku Buibau postu Administrativu Baucau municipiu Baucau iha fulan Abril 2010. 

Tais ne’e soru husi Madalena Ximenes idade 60 no tais ne’e halo iha tinan 1980. Tais mane Imi Leka Dao tahan rua mak suku hamutuk  predominante ho kór mean  ho risku neen iha tahan ida no tékniku futus/ikat. Tais tahan primeru hanesan ho segundu ho nia futus boot ("esu gi ina" lian Makasae) iha tais ninin taka ho risku ki'ikoan. Tais ne’e iha futus ki'ikoan ("esu gi mata" lian Makasae) taka risku mean husi sori-sorin  no iha futus ki’ik 12 entre risku mean/Imi leka. Materiál ba halo tais ne’e uza kabas loja no nia motif uza kór naturál. Tais ne’e iha motif ai-funan “Ai-talik nia funan”. Deskrisaun motif hirak ne’e reprezenta ai-horis ka símbol natureza. Dezeñu hirak ne’e refleta pintura sira iha ai-rin uma lulik nian iha parte etniku Makasae nian. Tais Imi Leka Dao ka risku mean neen ne’e valor aas numeru primeru  iha  estrutura sosiál ba ema Makasae sira. Bainhira halo lia hanesan fó barlake ba manefoun no manefoun troka ho karau, kuda,  bibi ka osan tuir valor tais ne’e.  Tais ne’e bain-bain ema liurai sira mak hatais hodi halo serimónia kulturál, simu bainaka espesiál hanesan selebrasaun loron nasionál, falun mate (serimonia funerál) no mos hatais loro-loron.