Joaquim Mendonsa ko'alia kona-ba istória orijen Mau Bisi Mauloko nian. 

Testu parte dahuluk ne'e: 

Entrevista ho Sr Joaquim Mendonsa
Tartehi, Maubisse Mauloko
24 Agostu, 2019

Ha’u-nia naran Joaquim Mendonsa. Uma lisan Kukulikit Tauit iha Mau Bisi Mauloko. Ha’u hein fatuk ho ai iha fatin naran Mau Bisi Mauloko. Rai ida ne’e iha desde rai sei furak. Iha Slata, iha Slata, hahan mós la tasak, buat hotu mós la tasak, bee nakonu hela. Sira hulan hela sasán to’o Fatubuilico. Bá to’o Fatubuilco fitun la sa’e, sira ba fali Lefilaukohati, depois sira ba Balakabalae, ba Olaelunaru. Sira fila nafatin mai Manusaenahili.

Sira mai Manusaenahili, sira fahe malu. Maun hein Manusaenahili, alin mai fali Slata. To’o Slata mai, ahi moris ona. Mai mosu fali iha ne’e, fulan naroman ona. Ba fatin-fatin sira ne’e fulan la naroman, fila fali mai iha fatin ida ne’e fulan naroman. Iha fatin ida ne’e hein 25 Abril halo serimónia kona-ba ida avo sira halo.