Iha tempu uluk liu bá, iha labarik nain rua, ida naran Mese no ida seluk naran Sufa, hakarak atu bá hasoru sira nia avó mane ida iha foho, ne'ebé foin mai hosi sidade. Iha dadersan nakukun de'it sira nain rua sai ona hosi uma atu bá hasoru sira nia avó ne'e. Bainhira to'o foho tutun, sira haree hetan borboleta barak loos ne'ebé hobur hela aifunan sira ne'ebé mesak furak no morin de'it.
Ho natureza ne'ebé furak loos, halo sira nain rua haree no haksolok tebes. Entaun lakleur Mese dehan ona bá Sufa “Ita halimar no duni borboleta hodi hein avó mane iha fatin ne'e bele ka lae?”. Sufa hatan “Bele, ha'u hakarak”. Hotu Mese dehan tan bá Sufa “Ita duni borboleta no kaer hafoin sura, se nian mak barak liu entaun ita fekit tilun bá malu”.
Nune'e sira nain rua hahú halimar, duni no kaer borboleta hahú hosi dader to'o meiudia. Lakleur, Sufa dehan bá Mese “Ha'u baruk ona”, Mese mós hatan “Lae, mai ita halimar nafatin to'o avó mai mak ita nain rua bá ho nia”. Nune'e sira nain rua mós kontinua halimar to'o loronkraik. Lakleur sira nain rua hahú sura borboleta ne'ebé sira kaer, iha ne'ebá Mese hetan atus lima no Sufa hetan de'it atus rua, nune'e Mese mak fekit ona Sufa nia tilun tanba nia mak hetan barak liu. Komu sira nain rua kontente loos ho sura borboleta no fekit tilun bá malu, entaun sira la haree avó atu mosu mai, afinal avó liu fali hosi dalan seluk ona. Hotu sira nain rua ko'alia bá malu no Mese dehan, “Sufa, ita fila ona bá uma tanba avó la mai ne'e”, Sufa mós hatan “Loos ona, ita nain rua fila de'it ona”. Nune'e sira nain rua mós fila ona bá uma. Bainhira sira to'o iha uma, sira hakfodak haree fali avó mane ne'e iha uma ona, Nune'e sira To'o kalan, sira mós toba ona. Teki-teki Mese mehi kona fali borboleta ne'ebé dansa, bidu no tebe-tebe hale'u nia ho nia alin Sufa. Iha mehi ne'e, borboleta halo oin a'at ba sira nain rua, nune'e halo Mese hakfodak no tauk loos, hafoin nia hakilar hadeer hakuak Sufa. Nune'e sira nia avó mós hadeer no husu ona bá sira, saida mak akontese daudaun ne'e. Hotu Mese haktuir ona nia mehi ne'e bá nia avó. Entaun nia avó husu bá sira “Ohin tuir dalan imi halo saida?”, Mese hatan “Ami la halo buat ida”. Afinal nia ko'alia bosok dei't, tamba iha loron ne'e, sira kaer no hamate borboleta barak loos. Bainhira sira toba fila-fali, lakleur Sufa mós mehi. Nia mehi hanesan saida mak Mese mehi ona, katak borboleta dansa no bidu ho tebe-tebe hale'u Mese ho Sufa no Borboleta halo oin a'at bá sira nain rua, halo Sufa ta'uk hodi hakfodak, hakilar no hader hakuak Mese. Entaun sira nia avó husu tan bá sira dehan “Ohin tuir dalan imi halo saida?”, komu Sufa ta'uk nia lahatan entaun Mese mak hatan ona dehan " Ohin ami halimar iha foho, duni borboleta hodi kaer no hamate barak loos, ha'u kaer atus lima no Sufa kaer atus rua. Ho mehi ida hanesan ne'e, halo avó ne'e hanoin loos Mese no Sufa, nune'e nia bá buka ona matan dook ida hodi mai kura nia bei-oan nain rua ne'e. 
Hafoin matan dook ne'e hateten bá sira katak “Imi nia sala mak duni no kaer borboleta iha foho, nune'e borboleta nain ne'e husu atu imi selu nia povu ne'ebé imi estraga tiha ona”. Hotu avó ne'e hatan “Ha'u prontu atu selu tanba ha'u hatene katak ne'e ha'u nia bei-oan sira nia sala”. Tanba ne'e, sira oho karau vaka ida hodi selu no husu perdaun bá sala ne'ebé Mese ho Sufa halo tiha ona. 
Hafoin liu tiha loron ida, borboleta sira nia nain dehan bá Mese ho Sufa nia avó liu hosi mehi ida katak “Ami bá ona maibé ohin bá oin labele estraga tan ha'u nia povu no ó nia oan sira mós sei la moras tan”. Hotu avó dehan no hameno kedas bá Mese ho Sufa atu labele estraga insetu sira maibé tenke proteje no hadomi insetu sira nune'e bele hafurak rai. 
Entaun hahú hosi ne'e kedas Mese ho Sufa la duni no kaer tan borboleta. Ikus mai sira mós la moras tan.